Mat 12 | ZomZIV | STEP | Tua hun lai Sabbath ni khat buhlei tawnin Jesu a pai hi. A nungzuite a gil uh kial a, buhvui zutin a ne uh hi.

Matthew 12

Sabbath’ Topa

1 Tua hun lai Sabbath ni khat buhlei tawnin Jesu a pai hi. A nungzuite a gil uh kial a, buhvui zutin a ne uh hi. 2 Pharisee-te in a muh uh ciangin ama kiangah, “En dih in! Na nungzuite Sabbath ni-in thukham tawh kituak loin a gamta uh hi,” a ci uh hi.

3 Jesu in, “David le a pawlte in a gilkial laitakun bang hih uh cih sim ngei lo na hi uh hiam? 4 Pasian inn sungah lutin amau ading ahi lo, siampite ading beka kisiangsaksa anlumte a ne uh hi. 5 Ahikeh siampite in biakinnpi sungah Sabbath ni a tan loh uh hangin mawhpeng hi veve uh hi, cih Thukham sungah sim kha ngei lo na hi uh hiam? 6 Biakinnpi sanga lianzaw khat ^{▼▼12.6 Ahikehnakhat ; tg. 41 le 42 ah zong} hih lai-ah a om hi, cih kong gen hi. 7 ‘Kei lunggulh in biakpiakna hi loin lainatna hizaw hi.’ ^{▼▼12.7 Hos. 6:6} cih thu a khiatna thei khin hi le uh cin a mawhpengte na mawhpaih kei ding uh hi. 8 Mihing Tapa, Sabbath ni Topa ahi hi,” a ci hi. ^c

9 Tua mun pan paikhia-a amaute synagogue sungah a lut hi. 10 Tua lai-ah a khut langkhat a tem mi khat a om hi. Amaute in Jesu mawhna a zon nop manun, “Sabbath ni-in cina damsak ding thukham tawh a kituak hiam?” ci-in a dong uh hi. ^d

11 Jesu in amaute kiangah, “Note lakah khatpeuh in tuu khat nei in, tua tuu Sabbath ni-in kawhawm ah kia zenzen leh, lakhia lo ding na hi uh hiam? 12 Tuu sangin mihing bangzahin manphazaw ahi hiam! Tua ahi ciangin Sabbath ni-in a hoih bawl ding thukham tawh kituak hi,” a ci hi. ^e

13 Tua khit ciangin amah in khuttempa kiangah, “Na khut zan in,” ci-in a sawl hi. Amah in a khut a zan leh a langkhat mah bangin a sa dim a, a damsiang kiuhkeuh hi. 14 Ahi hangin Pharisee-te paikhia uh a, Jesu thah theih nading zia a geelsim uh hi. ^f

Pasian Teel Nasempa

15 Jesu in hih thu thei-a tua mun pan a kihemkhia hi. Mi tampi in a mah zui uh a, cinate khempeuh damsak in, 16 amah kua hiam cih a gen loh nadingun a kham hi. 17 Hih in kamsangpa Isaiah tungtawna kigen:

18 “Ka it ka lung hong kimsak,
ka teel ka nasempa hih lai-ah om hi; ^g
ama tungah ka Kha ka koih dinga,
minamte tungah thutang a tangko ding hi. ^h
19 Amah in kuamah tawng lo, kiko lo dinga,
kongzing lakah kuamah in ama aw a za kei ding hi.
20 Thutang a gualzawhsak mateng,
satliamsa pumpeng kuaitan lo dinga,
mei kuang liakliak a sumit kei ding hi.
21 Minamte in a lametna uh ama minah a nga ding uh hi,” ^{▼▼12.21 Isa. 42:1-4} cih thu a tangtun nading ahi hi.

Jesu le Beelzebub

22 Tua ciangin amaute in mittaw-a pauthei lo, dawilut mi khat ama kiangah va puak uh a, tuapa in khua mu thei a, a pau theih nading in Jesu in a na damsak hi. 23 Mite khempeuh in lamdang sa uh a, “Hih pa David Tapa ahi kha thei tam?” a ci uh hi. ^j

24 Ahi hangin hih thu Pharisee-te in a zak uh ciangin, “Hih pa in dawite ukpa Beelzebub ^{▼▼12.24 Greek ah Beezeboul ahikeh Beelzeboul; tg.27 ah zong} bek suangin dawite a hawlkhia hi,” a ci uh hi. ^l

25 Jesu in amaute ngaihsutna thei-a, amaute kiangah, “Amah le amah ki langpanga kikhenthang gam a sia ding hi;amah le amah kilangpanga ki khenthang khuapi ahi a, innkuan ahi zongin a kip kei ding hi. 26 Satan in Satan hawlkhia leh amah le amah a kilem lo ahi hi. Tua hileh ama gam bangci kip thei ding ahi hiam? 27 Ken Beelzebub suangin dawite hawlkhia ka hileh na mite un kua suangin tuate hawlkhia ahi uh hiam? Tua ahi ciangin amaute no tungah thukhente a suak ding uh hi. 28 Ahi hangin Pasian Kha suanga hawlkhia ka hileh note tungah Pasian gam hong tung zo hi. ^m

29 “Tua tham loin mi khatpeuh in mihatpa hencip masa loin tuapa inn sungah lutin a neihsa bangci puak khiatsak thei ding ahi hiam? A hencip khit ciangin a inn luh thei pan ding hi.

30 “Kei hong koppih lote kei langa pang ahi hi. Kei hong kaihkhoppih lote a thehthang ahi hi. 31 Tua ahi ciangin ken kong geninah, mawhna le Pasian gen daina khempeuh kimaisak zo dinga, ahi hangin langpanga Kha gendaina a kimaisak zo kei ding hi. 32 Mihing Tapa a langgente peuhmah kimaisak dinga, ahi hangin Khasiangtho a langgen peuhmah tu khang ahi zongin, hong tung ding khang ahi zongin a kimaisak kei ding hi.

33 “Singkung a gah in kikhentel thei ahi manin a kung na hoihsak un, tua hileh gah hoih a gah ding hi; a kung na hoihsak kei un, tua hileh gah hoih lo a gah ding hi. 34 No mualtan suante aw, migilo note in bangci in thu hoih gen thei ding na hi uh hiam? Ahang in, lungsim a dimlet ciangin kamah pusuak pan hi. 35 Mi hoih in a sunga a kholsa na hoihte pusuah a, migilo in a sunga a kholsa na hoih lote a pusuah hi. 36 Ahi hangin mite in amau motpaunasate uh tawh kisai-in thukhen ni ciangin a telin a gen ding uh hi. 37 Ahang in, nomau kammalte tawh kizui-in note na mawhpeng ding uh a, nomau kam malte tawh kizui-in note hong kimawhpaih ding hi,” a ci hi. ⁿ

Jonah Lim

38 Tua ciangin Pharisee-te le thukham siate kimkhat in ama kiangah, “Sia aw, nang khut panin lim lamdang khat ka mu nuam uh hi,” a ci uh hi.

39 Jesu in, “A tatsia le angkawm hat no tu khang mite in lah lim lamdang nong ngen tazen ua! Kamsangpa Jonah lim longal lim dang hong kilak kei ding hi. 40 Ahang in, ngapi gil sungah Jonah sun thum le zan thum a om mah bangin Mihing Tapa zong lei sungah sun thum le zan thum a om ding hi. 41 Thukhen ni ciangin hih khang mite langah Nineveh a mite ding ding uh a, a mawhpaih ding uh hi. A hang in, Jonah thuhilhna hangin amaute a kisik uh hi. Tu-in hih lai-ah Jonah sanga lianzaw mi khat ^{▼▼12.41 Ahikeh nakhat; tg.42 ah zong} a om hi. 42 Thukhen ni ciangin hih khang mite langah Leitaw-lam Kumpinu dingin a mawhpaih ding hi. Ahang in, tua Kumpinu, Solomon pilna ngai dingin leimong panin a pai hi. Tu-in Solomon sanga lianzaw hih lai-ah a om hi. ^p

43 “Mi khat sung pan kha gilo ^{▼▼12.43 Greek ah nin} khat pusuak-a, a khawl nading a keuna mun zongin a vak kawikawi hangin a mu kei hi. 44 Tua ciangin, ‘Ka nusiatsa innah ciah kik ning,’ ci hi. A tun kik ciangin tua inn awng a, kiphiat siangin a kipuah sinsen a mu hi. 45 Tua ciangin amah pai-a amah sanga tatsiazaw adang kha sagihte zawnin, tua lai-ah a va teng uh hi. Tua mipa omdan nunung in a masa sangin a siazaw hi. Hih a tatsia khang mite zong tua mah bang ahi ding uh hi. ^r

Jesu Nu le A Sanggamte

46 Jesu in mihonpite kiangah thu a hilh laitakin amah hopih nuamin a nu le a sanggamte inn pua-ah ding uh hi. 47 Mi khat in, “Na nu le na sanggamte nang hong hopih nuamin inn pua-ah ding uh hi,” ^{▼▼12.47 Khutgelh pawlkhatah tg.47 nei lo hi} ci-in a gen hi. ^t

48 Amah in, “Ka nu kua hi-a, ka sang gamte kua ahi hiam?” a cih khit ciangin 49 a nungzuite kawka, “Ka nute ka saggamte hih lai-ate ahi hi. 50 Ahang in, vantung a om ka Pa deihna a hih peuhpeuh ka sanggam-nu, ka saggampa le ka nu ahi hi,” ci-in a dawng hi.